Google job 2026 जगप्रसिद्ध टेक कंपनी गुगल (Google) मध्ये काम करण्याचं स्वप्न तंत्रज्ञान क्षेत्रात करिअर करू पाहणाऱ्या प्रत्येक तरुणाचं असतं. उत्तम पगार, जागतिक दर्जाच्या सुविधा आणि नवनवीन तंत्रज्ञान शिकण्याची संधी यामुळे गुगलमधील नोकरीला विशेष महत्त्व आहे. मात्र, या नामांकित कंपनीत प्रवेश मिळवणं वाटतं तितकं सोपं नाही. अनेक तरुणांना प्रश्न पडतो की, गुगलमध्ये नेमकं सिलेक्शन कसं होतं? यासाठी कोणती शैक्षणिक पात्रता लागते? चला तर मग, जाणून घेऊया गुगलमधील या भरती प्रक्रियेच्या संदर्भात….
आवश्यक शैक्षणिक पात्रता
गुगलमध्ये नोकरी मिळवण्यासाठी तुमच्या पदवीपेक्षा तुमच्याकडच्या स्किल्सला (कौशल्यांना) जास्त महत्त्व दिलं जातं. तरीही, तांत्रिक पदांसाठी (Technical Roles) काही विशिष्ट शैक्षणिक पार्श्वभूमी असणं फायद्याचं ठरतं. वेगवेगळ्या पदांनुसार (उदा. मार्केटिंग, एचआर, सेल्स) ही पात्रता बदलू शकते.
- B.E. / B.Tech – कॉम्प्युटर सायन्स किंवा आयटी (IT) क्षेत्रातील पदवी.
- MCA – मास्टर ऑफ कॉम्प्युटर ॲप्लिकेशन्स.
- B.Sc / M.Sc – कॉम्प्युटर सायन्समध्ये पदवी किंवा पदव्युत्तर शिक्षण.
पगार आणि सोयीसुविधा
गुगलमध्ये पगार हा तुमच्या अनुभवावर आणि कामाच्या ठिकाणावर अवलंबून असतो. फ्रेशर्स (Freshers सुरुवातीला वार्षिक 15 लाख ते 40 लाख रुपयांपर्यंत पॅकेज मिळू शकतं. इंटर्नशिप करणाऱ्या विद्यार्थ्यांना महिन्याला 50 हजार ते 1 लाख रुपयांपर्यंत विद्यावेतन (Stipend) दिलं जातं. याशिवाय फ्री फूड, हेल्थ इन्शुरन्स आणि जगप्रसिद्ध ‘गुगल ऑफिस कल्चर’चा आनंद घेता येतो.
निवड प्रक्रिया
- गुगलमधील निवड प्रक्रिया साधारणपणे 6 ते 8 आठवड्यांची असते. ती खालील वेगवेगळ्या कॅटेगरीत विभागलेली असते.
- अर्ज करणे – सर्वात आधी ‘Google Careers’ या अधिकृत वेबसाईटवर जाऊन आपल्या आवडीच्या पोस्टसाठी अर्ज करावा लागतो. इथे तुमचा ‘रिझ्युमे’ (Resume) अत्यंत प्रभावी असणं गरजेचं आहे.
- शॉर्टलिस्टिंग – रिझ्युमे शॉर्टलिस्ट झाल्यानंतर गुगलचे रिक्रूटर तुमच्याशी संपर्क साधतात.
- चाचणी (Assessment) – पदाच्या स्वरूपानुसार कोडिंग टेस्ट, केस स्टडी किंवा तांत्रिक प्रश्न विचारले जातात.
- इंटरव्ह्यू – यामध्ये तांत्रिक मुलाखतींसोबतच तुमच्या व्यक्तिमत्त्वाची (Personality Interview) चाचणी घेतली जाते. शेवटी ‘हायरिंग कमिटी’ अंतिम निर्णय घेते.